Átök innan Sjúkraliðafélags Íslands

Hópur sjúkraliða, sem barist hefur gegn nýrri námsleið til sjúkraliða, afhenti í menntamálaráðuneytinu í morgun undirskriftalista með 586 nöfnum þar sem mótmælt er styttingu námsins og tók aðstoðarmaður ráðherra við undirskriftunum. Sjúkraliðarnir eru óánægðir með að fjölbrautaskólum hafi verið leyft að bjóða ófaglærðu starfsfólki heilbrigðisstofnana að nýta starfsreynslu og námskeið til að fá helminga styttra nám til sjúkraliða. Í stað 120 eininga náms dugi 60 einingar til að fá réttindi sjúkraliða. ..

Sjúkraliðarnir sem mættu í ráðuneytið í morgun tala aðeins fyrir hönd hluta stéttarinnar því Stjórn Sjúkraliðafélagsins sem og fulltrúaþing félagsins hafa ítrekað stutt hina nýju námsleið. Hefur óánægjuhópurinn nú kynnt að Guðrún Katrín Jónsdóttir hyggist bjóða sig fram til formanns gegn Kristínu Á. Guðmundsdóttur, sem stýrt hefur félaginu frá árinu 1986, en aðalfundur fer fram í lok maí.