Fær bætur frá ríkinu vegna líkamsárásar

Héraðsdómur Reykjavíkur dæmdi í dag íslenska ríkið til þess að greiða karlmanni rúmar 2,6 milljónir króna í skaðabætur vegna líkamsárásar sem hann varð fyrir á veitingastað í höfuðborginni í febrúar fyrir fjórum árum. Lögregla var kölluð á vettvang en þá var árásarmaðurinn á bak og burt og fannst hann aldrei.

Maðurinn sem varð fyrir árásinni reyndist hafa ökklabrotnað í árásinni og mátu læknar varanlega örorku hans sjö prósent. Maðurinn krafði ríkið um bætur á grundvelli laga um greiðslu ríkissjóðs á bótum til þolenda afbrota.

Í ljósi þess að vitni urðu að árásinni og á grundvelli örorkumatsins komst dómurinn að þeirri niðurstöðu að maðurinn hefði orðið fyrir árás og ætti því rétt á bótum úr ríkissjóði.