Grétar Rafn með nýtt tilboð frá AZ

Landsliðsmaðurinn Grétar Rafn Steinsson hefur síðustu daga verið orðaður við Middlesbrough og Newcastle. Fjölmiðlar bæði í Hollandi og Englandi hafa gefið í skyn að Grétar sé mjög spenntur fyrir því að fara í ensku úrvalsdeildina. Þó segir hann sjálfur að hann sé afar sáttur hjá AZ Alkmaar í Hollandi.

„Ég hef það mjög gott í Alkmaar. Félagið var að bjóða mér nýjan fimm ára samning," sagði Grétar Rafn, sem er þegar samningsbundinn liðinu til 2011. Nýr samningur myndi fela í sér að hann yrði bundinn liðinu til 2012 og fengi þar að auki myndarlega launahækkun.

„Í AZ er ég í góðu liði sem hefur náð mjög góðum árangri. Ég er með mjög góðan þjálfara og tek stöðugum framförum þar. Í vetur unnum við Sevilla og slógum út bæði Fenerbahce og Newcastle," sagði Grétar en þjálfari hans hjá AZ er Louis van Gaal. „Ég hef þó mín markmið sem ég ætla mér að ná. Ég verð bara að sjá til hvað gerist."

Hann segir þó að það sé ljóst að það þyrfti eitthvað mikið til að hann færi að söðla um. „Ég færi ekki að rífa mig upp með rótum bara til þess eins að sitja á bekknum í einhverju liði. Það er spennandi að ensk úrvalsdeildarfélög sýni mér áhuga en það eitt er ekki nóg. En þetta eru allt vangaveltur eins og er."

Hann er nú staddur á Siglufirði þar sem hann tekur lífinu með ró í faðmi fjölskyldunnar og vina. Grétar segist ætla að nota tímann vel til að taka því rólega og taka sér algjört frá frá knattspyrnu.

„Það hefur verið mikið að gerast og voru síðustu vikurnar í Hollandi mikil vonbrigði fyrir okkur. Ekki batnaði það svo með landsliðinu," sagði hann.

AZ Alkmaar missti naumlega af hollenska meistaratitlinum sem og meistaradeildarsæti. Liðið tapaði þar að auki í úrslitum bikarkeppninnar.

„Þetta er harður heimur og það fylgja þessu oft töp. Ég ætla því ekkert að pæla í þessum málum fyrr en ég mæti aftur í vinnuna," sagði Grétar Rafn.

eirikur@frettabladid.is