Síðasta tækifæri Liverpool

Liverpool-menn fá í dag síðasta tækifærið til þess að vinna Arsenal á tímabilinu þegar liðin mætast í hádegisleiknum í ensku úrvalsdeildinni.

Arsenal hefur unnið alla þrjá leiki liðanna í vetur: 0-3 í fyrri deildarleiknum á Emirates-vellinum og svo tvisvar á þremur dögum á Anifeld í bikarkeppnunum, fyrst 1-3 í FA-bikarnum og svo 3-6 í deildarbikarnum.

„Ég er viss um að töpin fyrir þeim í bikarnum og deildarbikarnum hjálpi mínum mönnum til þess að koma grimmir inn í þennan leik. Það er enginn búinn að gleyma þessum leikjum. Það er alltaf stórleikur þegar við mætum Arsenal og þetta verður gaman,“ sagði Rafael Benitez, stjóri Liverpool.