Glæsimark Kaka dugði skammt

Miðjumaðurinn Kaka skoraði glæsilegt mark af 30 metra færi í gærkvöld en það dugði Brasilíumönnum ekki í 1-1 jafntefli liðsins gegn Perú í undankeppni HM í Suður-Ameríku.

Kaka skoraði tvívegis í 5-0 sigri Brasilíu á Ekvador í síðasta mánuði og var á skotskónum skömmu fyrir leikhlé í gær. En öskubuskulið Perú kom til baka og jafnaði á 71. mínútu með marki Juan Vargas fyrir utan teig. Þetta var fyrsta mark Perú í riðlinum og fyrsta markið sem Brasilíumenn fá á sig.

Brassar hafa fimm stig eftir þrjá leiki í riðlinum en Perúmenn tvö í þessari hörðu tveggja ára undankeppni. Perú hefur ekki komist á HM síðan árið 1982.

Argentínumenn eru á toppnum í Suður-Ameríkuriðlinum með fullt hús, 9 stig, Paragvæ er í öðru með 7 og Brasilíumenn og Kólumbíumenn hafa 5 stig. Ekvador er í 10. og neðsta sæti án stiga.