Leitar að höfði til að húðflúra

Blane Dickinson leitar nú ákaft að höfði til að húðflúra.

Dickinson er rúmlega þrítugur húðflúrlistamaður í Bretlandi. Hann hefur fengið þá nýstárlegu hugmynd að skreyta höfuð með mynd af dæmigerðum breskum morgunmat.

 En til þess vantar hann mann eða konu sem er til í að veita honum aðgang að höfuðleðri sínu.

Hugmynd Dickinsons er að teikna hníf og gaffal hvort sínum megin höfuðsins á bak við eyrun.

Síðan verður flúraður diskur á milli með spældum eggjum, beikoni og pylsum og öðru hefðbundnu góðgæti, „en ég er alveg til í að gera breytingar til að hæfa smekk eða bakgrunni hvers sem er,“ segir listamaðurinn.

„Ég hef gaman af því að fá fólk til að hugsa,“ segir Dickinson til útskýringar.