Læknar svartsýnir á bata Sharons

Ariel Sharon liggur þungt haldinn á sjúkrahúsi í Ísrael. Hann fékk heilablóðfall í gærkvöldi og læknar eru svartsýnir á bata. Ehud Olmert aðstoðarforsætisráðherra hefur tekið við stjórn landsins.

Heilablóðfall Sharons að þessu sinni er talið mun alvarlegra en það sem hann fékk þann 18. desember síðastliðinn að sögn talsmanns forsætisráðuneytisins. Læknar eru ekki bjartsýnir um bata þrátt fyrir að tekist hafi að stöðva blæðingar í Sharons en hann gekkst undir aðgerð í nótt sem tók sjö klukkustundir. Sharon er sagður hafa lamaðist í neðri hluta líkamans og er honum haldið sofandi í öndunarvél.

Eftir heilablóðfallið í desember, sögðu læknar Sharon, sem er 77 ára, hann vera allt of þungan en að öðru leyti við nokkuð góða heilsu.

Aðstoðarforsætisráðherra Ísrael, Ehud Olmert, hefur tekið við völdum sem forsætisráðherra og stýrði hann neyðarfundi ríkisstjórnarinnar í morgun. Enn er gert ráð fyrir þingkosningum þann 28. mars í Ísrael þrátt fyrir veikindi Sharons. Stjórnmálaskýrendur þar í landi segja stjórnmálaástandið vera í mikilli óvissu og ekki síst framtíð Kadima-flokksins sem Sharon er nýbúinn að stofna eftir að hann sagði sig úr Likudbandalaginu. Skoðanakannanir sem gerðar voru eftir að Sharon fékk fyrra heilblóðfallið hafa gert ráð fyrir að Kadima-flokkurinn myndi bera sigur úr býtum í kosningunum í mars og fengi um þriðjung sæta af þeim 120 sætum sem í boði eru á ísraelska þinginu, sem kallast Knesset. Litlar líkur eru nú taldar á að svo verði þar sem Sharon sjálfur er í raun flokkurinn.

Óvíst er hvort dagar Sharon séu brátt taldir en stjórnmálaskýrendur segja þó nærri öruggt að stjórnmálaferill forsætisráðherrans séu á enda. George Bush Bandaríkjaforseti sagði á blaðamannafundi í morgun að Sharon væri maður hugrekkis og friðar. Talsmaður Hamas, samtaka sagði hins vegar í morgun að Miðausturlönd væru betur sett án Sharons. Heimurinn væri um það bil að losna við einn af sínum verstu og grimmustu leiðtogum.