Engin svör enn frá El Salvador vegna morðsins á Jóni Þór Ólafssyni

Íslensk lögregluyfirvöld hafa engin svör fengið frá El Salvador, um það hvernig rannsókninni á morðinu á Jóni Þór Ólafssyni miðar. Jón Þór var myrtur á sunnudagsmorgun, ásamt innfæddri konu, en þau voru bæði skotin með sjálfvirkri byssu, -hann að minnsta kosti tuttugu skotum.

Ekkert bendir til þess að þeim hafi verið rænt segja þarlend yfirvöld hjá glæpadeild lögreglu í borginni segir að líkin hafi fundist af tilviljun á sunnudag við þjóðveginn frá San Salvador til Santa Ana um fjörutíu kílómetra frá borginni. Ekki sé víst að þau hafi verið myrt á þessum sama stað. Líkin fundust á sunnudag en ekki var vitað að þetta var Jón Þór fyrr en í gær.

Jón Þór var verkfræðingur og starfaði í San Salvador við gerð jarðvarmaorkuvers á vegum fyrirtækisins Enex. Að jafnaði hafa tveir til fjórir íslendingar verið við störf á vegum fyrirtækisins frá því í fyrravor. Samkvæmt tilkynningu frá aðstandendum hófst leit að Jóni á sunnudag eftir að samstarfsmenn hans höfðu gert lögreglu viðvart.

Jón Þór var þrjátíu og sjö ára gamall. Hann lætur eftir sig sambýliskonu og tvö ung börn á skólaaldri úr fyrri sambúð.

Lárus Elíasson, framkvæmdastjóri ENEX segir að Jón Þór hafi verið ásamt öðrum íslendingi í El Salvador en báðir voru staðsettir í San Salvador. Jón Þór hafi verið saknað síðan á laugardag. Lárus segir að starfsmenn Enex séu harmi slegnir yfir þessum atburði. Glæpir séu tíiðir í El Salvador en allt hafi veirð reynt að gera til að auka öryggi íslensku starfsmannnana.

Tildrög þess að Jón Þór fannst látinn eru ókunn en alþjóðadeild Ríkislögreglustjóra og lögregluyfirvöld í El Salvador fara með rannsókn málsins.

Lík Jóns Þórs verður flutt heim á næstu dögum, - um leið og lögreglan ytra gefur til þess leyfi.