Mótmæla valdatöku Gyanendra

Mótmæli gegn konungi Nepals, Gyanendra standa enn yfir. Yfir helgina skutu hermenn tvo mótmælendur til bana en konungur landsins lagði á útgöngubann í höfuðborginni Katmandu og skipaði hermönnum sínum að skjóta alla sem ekki virtu bannið. Þúsundir hafa mótmælt ólýðræðislegri valdatöku Gyanendra fyrir 14 mánuðum. Konungurinn hefur hins vegar réttlætt valdatökuna þar sem stjórnvöld hafi brugðist í baráttunni gegn skæruliðum maóista. Búist er við áframhaldandi mótmælum og hafa margir birgt sig upp af mat og öðrum nauðsynjavörum.