Landgönguliðar sakaðir um morð

Tólf bandarískir landgönguliðar í Írak sæta nú rannsókn en þeir eru grunaðir um að hafa framið stríðsglæpi. Þeir eru sakaðir um að hafa myrt 15 óbreytta borgara, þar á meðal þriggja ára stúlku, í bænum Haditha í Vestur-Írak í nóvember í fyrra.

Íbúar á svæðinu segja að skömmu eftir að vegsprengja varð landgönguliða að bana hafi hersveit farið í nálæg hús og liðsmenn hennar skotið fólkið. Eftir atburðin sögðu landgönguliðarnir að setið hefði verið um þá og til skotbardaga hefði komið. Átta andspyrnumenn og fimmtán almennir borgarar hefðu legið í valnum.

Bandaríska fréttatímaritið Time hefur sent frá sér myndband sem sagt er sýna eftirmála atburðanna. AP-fréttastofan segir að ekki hafi tekist að fá það staðfest að myndirnar séu ófalsaðar.