Fellibylur kostaði engin mannslíf

Svo virðist sem enginn hafi látið lífið þegar fellibylurinn Larry fór yfir strandsvæði í norðaustur Ástralíu í fyrrinótt. Miklar skemmdir urðu í veðurofsanum en aðeins um þrjátíu manns slösuðust.

Her- og björgunarsveitarmenn eru nú komnir á svæðið með vistir og hjálpargöng og til að aðstoða við hreinsunarstarf. Talið er að mörg þúsund heimili hafi eyðilagst í veðurofsanum en í verstu hviðum náði vindhraðinn um 290 km/klst.

Bærinn Innisfail í Qeensland-héraði varð verst úti. Þar er mikil banana- og sykurreyr rækt en mikill hluti ræktarlands eyðilagðist í óveðrinu. Fellibylurinn Larry er sá öflugasti sem skellur á Ástralíu síðan á aðfangadag 1974 þegar fellibylurinn Tracy varð sextíu og fimm manns að bana.