Klinsmann ánægður með varamennina

Jurgen Klinsmann, þjálfari Þjóðverja var að vonum ánægður með 1-0 sigur sinna manna á Pólverjum í gær. Hann var sérstaklega ánægður með innkomu varamannanna í leiknum en það var Oliver Neuville sem skoraði sigurmark heimamanna en hann hafði komið inná stuttu áður.

Þetta var fyrsti sigur þjóðverja á Evrópuþjóð síðan þeir unnu Tékka í úrslitum EM í Englandi 1996 og var þá Jurgen Klinsmann fyrirliði liðsins.

"Við vildum setja meiri hraða inn í leikinn og þeir leikmenn sem komu inn á hafa hraðann. Þeir komu með nýtt blóð inn í leikinn. Þetta var góð stund fyrir okkur og Þýskaland að vinna þennan leik. Þegar allt gengur upp eins og hjá okkur undir lokin getur maður andað léttar," sagði Klinsmann.