Sviss

Svisslendingar eru í G riðli með Frökkum, Suður Kóreumönnum og Tógóbúum. Þeir ættu að geta slegist við Suður Kóreu menn um annað sætið í riðlinum á eftir Frökkum. Sviss er í 35. sæti á styrkleikalista FIFA.

Svisslendingar komust á ævintýralegan hátt á HM. Þeir slógu út Tyrki í umspili um laust sæti með fleiri mörk skoruð á útivelli. Þeir eru ekki með sterkari liðum og að komast eitthvað áfram í keppninni væri stórsigur fyrir þá.

Það er Jakob „Kobi" Kuhn sem stýrir liðinu. Hann tók við árið 2001 og er fyrsti Svisslendingurinn sem stjórnar í 12 ár. Hann kom liðinu á EM 2004 og er nú á leið til Þýskalands sem verður að teljast nokkuð gott.

Hinn leikreyndi fastamaður í Svissneska liðinu Hakan Yakin var ekki valinn í HM hópinn. Hann hefur lítið leikið í vetur vegna meiðsla en var búinn að ná sér að fullu og vonaðist til þess að vera valinn.

Leikmaður Rennes Alexander Frei hefur verið iðinn við markaskorun bæði í Frakklandi og fyrir landslið sitt. Hann verður að vera í toppformi ætli Svisslendingar sér eitthvað á mótinu.

Fyrirliði: Johan Vogel

Lykilmaður: Alexander Frei

Gæti slegið í gegn: Marco Streller