Öryggisráðið þarf að grípa til aðgerða

Condoleezza Rice, utanríkisráðherra Bandaríkjanna segir ólíklegt að Íranar hætti auðgun úrans. Öryggisráð Sameinuðu þjóðanna þurfi því að grípa til aðgerða til að viðhalda trúverðugleika sínum.

Frestur sá sem Öryggisráðið veitti Írönum til að hætta auðgun úrans rennur út á morgun. Þá mun Alþjóða kjarnorkumálastofnunin gera ráðinu grein fyrir stöðu mála.

Íranar hafa hafnað þessum fresti. Ahmadinejad, Íransforseti, sagði í ræðu í dag að engum myndi takast að neyða Írana til að láta frá sér kjarnorkutækni sína. Kjarnorkuáætlun landsins ætti ekki að ógna öðrum ríkjum.

Angela Merkel, kanslari Þýskalands, og Pútín Rússlandsforseti, funduðu í Síberíu í dag. Merkel lagði þá áherslu á að alþjóðasamfélagið stæði saman í kjarnorkudeilunni við Írana. Pútín lagði áherslu á að Alþjóða kjarnorkumálastofnunin viki sér ekki undan skyldum sínum með því að vísa málinu til Öryggisráðsins. Merkel og Pútín voru sammála um að eina leiðin til lausnar á deilunni væri samningaleiðin.

Condoleezza Rice, utanríkisráðherra Bandaríkjanna, situr nú óformlegan fund utanríkisráðherra Atlandshafsbandalagsríkja sem hófst í Búlgaríu í dag. Rice sagði á blaðamannafundi að ríki Öryggisráðsins yrðu að vera reiðubúin til að grípa til aðgerða til að bregðast við aðgerðaleysi Írana. Hún bætti því við að varla þyrfti að taka það fram að Bandaríkin litu svo á að Öryggisráðið yrði að grípa til aðgerað til að viðhalda trúverðugleika sínum.

Samtök Írana í útlegð segja stjórnvöld í Teheran vinn að þróun hraðvirkrar skilvindu sem mun stytta þann tíma sem fer í auðgun úrans til muna. Íransforseti segir þá tækni í skoðun en fulltrúi Írana í útlegð segir stjórnvöld í Teheran hugsanlega geta tekið þá tækni í gagnið á næstu mánuðum.