Íranir láta andstöðu alþjóðasamfélagsins ekki á sig fá

Allt bendir til þess að Íranar ætli að halda áfram auðgun úrans þrátt fyrir kröfur alþjóðasamfélagsins um að því verði hætt. Stjórnvöld í Teheran segjast ætla að hætta allri samvinnu við Alþjóða kjarnorkumálastofnunina verði gripið til refsiaðgerða og hafa boðið nágrannaríkjum sínum aðgang að kjarnorkutækni sinni. Sá frestur sem Öryggisráð Sameinuðu þjóðanna hefur veitt Írönu til að hætta auðgun úrans rennur út á föstudaginn en þá kynna fulltrúar Alþjóða kjarnorkumálastofnunarinnar ráðinu nýja skýrslu um stöðuna í kjarnorkudeilunni við stjórnvöld í Teheran.

Ali Larijani, aðal samningamaður Írana í kjarnorkumálum, sagði í dag að stjórnvöld í Teheran hætti þegar allri samvinnu við Aljóða kjarnorkumálastofnunina grípi Öryggisráðið til refsiaðgerða líkt og Bandaríkjamenn og Bretar vilja. Hann sagði hernaðaraðgerðir ekki draga kjarkinn úr Írönum sem ætluðu að nýta sér kjarnorku. Ummæli Larijanis koma degi eftir að Ahmadinejad, Íransforseti, spáði því áð Öryggisráið myndi ekki grípa til refsiaðgerða og varaði við því að til greina kæmi að draga sig úr samstarfi á vettvangi samningsins um bann við drefingu kjarnorkuvopna.

Ali Khamenei, æðsti klerkur í Íran, segir stjórnvöld í Teheran tilbúin að veita nágrannaríkjum aðgang að kjarnorkutækni sinni. Ætla má að þessi ummæli vekji hörð viðbrögð frá vestrænum ríkjum.

Ali Khamenei fundaði í dag með Omar al-Bashir, Súdansforseta. Súdanar hafa áður lýst því yfir að þeir hefðu áhuga á að nýta kjarnorku til raforkuframleiðslu þar sem óvíst er hvort orkuþörf í framtíðinni verði svarað með núverandi framleiðslu. Írönur er ekki bannað að veita upplýsingar um kjarnorkuáætlun sína svo fremi að þeir og þau ríki sem fengju aðgang að upplýsingunum séu aðilar að alþjóðasamningnum um bann við dreifingu kjarnorkuvopna. Auk þess verður Alþjóða kjarnorkumálastofnunin að hafa eftirlit með upplýsingagjöfinni.