Tíu menn handteknir vegna hryðjuverka í Egyptalandi

Egypska lögreglan hefur handtekið tíu menn vegna hryðjuverkanna í gær, sem urðu tuttugu og þremur að bana. Árásirnar voru ekki sjálfsmorðsárásir, heldur var tímasprengjum komið fyrir á jörðu niðri.

Sérfræðingar í öryggismálum sem hafa farið yfir vettvang árásanna telja nær öruggt að ekki hafi verið um sjálfsmorðsárásir að ræða. Þrjár tímasprengjur hafi verið stilltar hver á fætur annarri og þeim komið fyrir á fjölförnum stað á annatíma. Í sprengjunum hafi meðal annars verið byssupúður og naglar.

Tuttugu og þrír létust í árásunum og sextíu og tveir særðust. Samkvæmt upplýsingum frá Utanríkisráðuneytinu voru ein íslensk hjón á staðnum en þau sakaði ekki. Þýskur drengur féll í árásunum og eins tveir aðrir ferðamenn, en flestir sem týndu lífi voru heimamenn. Þetta er þriðja sprengjuárásin á ferðamannastað á Sínaískaga á einu og hálfu ári. Enn hefur enginn lýst ábyrgð á árásunum í gær, en þær bera öll sömu ummerki og hinar árásirnar tvær við Rauðahafið.

Ekki er talið að árásirnar tengist á nokkurn hátt ávarpi Osama bin Laden þar sem hann hvatti múslima til að halda áfram heilögu stríði gegn vesturlandabúum og öðrum krossförum.