Mannskæðasta sjálfsmorðsárásin í rúmt ár

Sextán ára gamall liðsmaður palestínsku samtakanna Heilagt stríð varð í dag níu manns að bana í Tel Aviv í Ísrael. Formælandi Hamas-hreyfingarinnar segir árásina, sem er sú mannskæðasta í rúmt ár, lögmæta sjálfsvörn.

Sextán ára gamall piltur frá Jenín er talinn hafa framið sjálfsmorðsárásina í Tel Aviv í morgun. Níu biðu bana og 49 særðust í tilræðinu sem var framið fyrir framan fjölfarinn skyndibitastað við aðalumferðarmiðstöð borgarinnar. Það kom fáum á óvart að samtökin Heilagt stríð lýstu yfir ábyrgð á hryðjuverkinu en þau hafa staðið á bak við flestar slíkar árásir sem gerð hafa verið í Ísrael undanfarin misseri. Svo mannskætt tilræði hefur hins vegar ekki verið framið í rúmt ár. Ehud Olmert forsætisráðherra sagði nú síðdegis að brugðist yrði við ódæðinu með viðeigandi hætti. Þótt Heilagt stríð hefði þegar eignað sér þann vafasama heiður að hafa komið því í kring sagði Olmert að endanleg ábyrgð lægi hjá Hamas-samtökunum sem nú leiða ríkisstjórn Palestínumanna. Formælandi hreyfingarinnar lét þá skoðun í ljós fyrr í dag að hermdarverkið væri lögmæt sjálfsvörn gegn hernámi Ísraela. Mahmoud Abbas forseti Palestínu sagði slíkt hins vegar víðs fjarri í yfirlýsingu sinni í dag.

Sjálfsagt er hefndaraðgerða Ísraela ekki langt að bíða og því er útlit fyrir að enn á ný myndist vítahringur ofbeldis fyrir botni Miðjarðarhafs. Það verður tæpast til að bæta hag íbúa herteknu svæðanna og á meðan verður enginn hörgull á unglingspiltum sem telja sig hafa svo litlu að tapa að píslarvættisdauði er þeim raunverulegur valkostur.