Myndar líklega ekki ríkisstjórn fyrr en um miðjan maí

Romando Prodi, leiðtogi mið- og vinstrimanna á Ítalíu, segist líklega ekki getað myndað nýja ríkisstjórn fyrr en um miðjan maí þegar nýr forseti landsins hefur verið kosinn. Hann hafnar algjörlega tillögu Silvios Berlusconi, forsætisráðherra og leiðtoga hægrimanna, um myndun samsteypustjórnar.

Ólífubandalagið undir forystu Romanos Prodis sigraði í þingkosningum á Ítalíu á sunnudag og mánudag sem voru þær mest spennandi í seinni tíð. Munurinn á fylkingum Prodis og Silvios Berlusconis, sitjandi forsætisráðherra, var reyndar svo lítill að sá síðarnefndi hefur farið fram á endurtalningu atkvæða. Berlusconi lagði til í gær að fylkingarnar mynduðu samsteypustjórn en því hafnaði Profid alfarið.

Það er því ljóst að ný ríkisstjórn verður ekki mynduð á næstu dögum eða vikum því í morgun lýsti Prodi því yfir að hann þyrfti líklega að bíða fram yfir forsetakosningar í landinu, sem fram fara um miðjan næsta mánuð, eftir umboði til stjórnarmyndunar. Samkvæmt stjórnarskrá Ítalíu fær sigurvegari þingkosninga umboð frá forseta til stjórnarmyndunar en Carlo Azeglia Ciampi, forseti landins, hefur ýjað að því að hann vilji láta eftirmann sinn um að fela Prodi umboð til stjórnarmyndunar.

Þetta þykir auka enn á óvissuna í ítölskum stjórnmálum en sérfræðingar segja að þótt Prodi myndi nýja ríkisstjórn hafi hann það nauman meirihluta að erfitt geti reynst að hrinda í framkvæmd nauðsynlegum umbótum í efnahagslífi landsins.