Sýkti svanurinn ef til vill á leið til Íslands

Svanurinn, sem fannst dauður í Skotlandi á dögunum, og var síðar greindur með fuglaflensuveiru af gerðinni H5N1, var ef til vill á leið til Íslands að sögn Martins Fowlie, hjá breska fuglafræðifélaginu. Frá þessu greinir fréttastofan BBC. Um var að ræða álft en ekki hnúðsvan eins og haldið var fram í fyrstu. Álftir haldi til í Bretlandi og á meginlandi Evrópu yfir vetrartímann en fljúgi síðan til Íslands, Skandinavíu og Norður-Rússlands á vorin. Þá segja dýralæknar á Bretlandseyjum líklegt að fuglinn hafi drepist á hafi og skolað upp að ströndum Skotlands.