Chirac skarst í leikinn

Jacques Chirac Frakklandsforseti tilkynnti í dag að umdeildar breytingar á atvinnulöggjöf landsins yrðu afnumdar. Pólitísk framtíð Dominique du Villepin forsætisráðherra þykir óljós en hann barðist fyrir lögunum með oddi og egg.

Verkföll, mótmæli og uppþot hafa sett svip sinn á franskt þjóðfélag undanfarnar vikur eftir að ríkisstjórnin gerði breytingar á atvinnulöggjöf landsins til að auka hreyfanleika á vinnumarkaði. Andstæðingar þeirra bentu hins vegar á að í skjóli laganna væri atvinnurekendum gert auðveldara að reka ungt fólk úr vinnu án skýringa. Engin lausn virtist í sjónmáli á þessari erfiðu deilu, þar til í morgun þegar Jacques Chirac forseti kallaði ríkistjórnina á sinn fund og sagðist ætla að nema lögin úr gildi. Í staðinn verður gripið til annarra aðgerða til að vinna bug á atvinnuleysi ungmenna. Dominque de Villepan forsætisráðherra fékk það verkefni að greina frá ákvörðuninni.

Enginn hefur barist harðar fyrir lögunum en Villepin og því hlýtur ákvörðun Chiracs að vera honum reiðarslag. Segja má að hann hafi lagt pólitískt líf sitt að veði fyrir lögin og nú þegar vinsældir hans hafa hrapað úr 49 prósentum í 25 hlýtur framtíð hans að vera óljós. Innan við ár er liðið síðan Chirac losaði sig við Jean-Pierr Raffarin, forvera Víllpans, eftir að Frakkar höfnuðu stjórnarskrársáttmála Evrópusambandsins í þjóðaratkvæðagreiðslu. Hvort sömu örlög bíða Villepins nú ræðst væntanlega á næstu dögum.