Þrjár milljónir manna mótmæla í Frakklandi

Hátt á þriðju milljón mótmælti nýrri vinnulöggjöf harðlega í Frakklandi í dag. Andstæðingar hennar segja yngra fólki gert erfiðara um vik að fá langtímaráðningu og auðveldi vinnuveitendum að halda launum niðri. Lögreglan átti fullt í fangi með að verjast æstum mótmælendum sem ætla ekki að bakka fyrr en lögin verða dregin til baka.

Mótmælin fóru illa fram og handtók lögreglan hundruð vegna ólátanna. Aðgerðirnar höfðu veruleg áhrif á almenningssamgöngur en stór hluti starfsmanna Air France flugfélagsins lagði niður störf til að sýna samhug í verki.

Þá lögðu bréfberar og aðrir starfsmenn póstþjónustunnar niður vinnu í dag. Sömuleiðis lestarstjórar, kennarar og starfsmenn fjölmiðla, svo nokkrir séu nefndir.

Gríðarleg öryggisgæsla er í öllu landinu og í höfuðborginni einni stóðu yfir fjögur þúsund óeirðalögreglumenn á vakt enda full þörf á. Lögin sem um ræðir heimila atvinnurekendum að reka úr starfi án skýringa starfsmenn sína sem hafa unnið hjá þeim undir tveimur árum.

Andstæðingar laganna segja lögin gera það að verkum að erfiðara verði fyrir ungt fólk að fá langtímaráðningu og auðveldi vinnuveitendum að halda launum niðri en um 23% Frakka á aldrinum 18-23 ára er án atvinnu. Forsætisráðherra landsins hefur til þessa verið harður á því að halda sig við nýju lögin en ljóst er að andstaðan gegn þeim eykst sífellt.

Lögreglan óttast enn harðari mótmæli í kvöld og í nótt og hefur stærstur hluti lögregluliðsins í París verið kallaður á vakt.