Bandaríkjamenn afsali sér yfirstjórn öryggismála

Ríkisstjórn Íraks krefst þess að Bandaríkjamenn afsali sér yfirstjórn öryggismála í hendur Íraka og héraðsstjórinn í Bagdad er hættur allri samvinnu við Bandaríkjamenn. Íraskir og bandarískir hermenn felldu um tuttugu manns við mosku, í borginni, í gær. Mikið blóðbað var í Írak um helgina og í dag.

Mikill mannfjöldi var í dag viðstaddur útför tuttugu manna sem skotnir voru í eða í grennd við Mústafa moskuna í shíahverfi í Bagdad. Fólkið var mjög reitt og hrópaði ókvæðisorð um Bandaríkjamenn.

Óljóst er hvað gerðist eiginlega í moskunni, í gærkvöldi. Bandaríkjamenn segja að íraskir sérsveitarmenn, undir leiðsögn bandarískra foringja hafi ráðist til inngöngu í hús sem ekki tilheyrði henni, eftir að skotið var á þá. Í bardaganum sem á eftir fylgdi hafi sextán uppreisnarmenn skotnir til bana, og fimmtán eða sextán handteknir.

Á fundi með fréttamönnum, í dag, sögðu hinsvegar talsmenn ríkisstjórnar sjía múslima að ráðist hefði verið inn í moskuna og tuttugu menn skotnir með köldu blóði. Bandaríkjamenn hafa ekki brugðist beint við þessum ásökunum.

Jawad Al Maliki, talsmaður ríkisstjórnarinnar og náinn samstarfsmaður Ibrahims al-Jafaris, forsætisráðherra, sagði að stjórnin krefðist þess að bandaríkjamenn afsöluðu sér yfirstjórn öryggismála í landinu, þeir hafi gert alltof mörg meiriháttar mistök. Bandaríkjamenn hafa heldur ekki svarað þeirri kröfu.

Trúflokkaátök milli sjía og súnní múslima virðast halda áfram. Í gær fundust tugir líka, sum höfuðlaus, í grennd við Bagdad. Í dag létust svo að minnsta kosti fjörutíu manns í sjálfsmorðssprengjuárás á lögreglustöð í Mósul.