Hart deilt um aðkomu UMFÍ að umsögn

Formaður Ungmennafélags Íslands, segir samtökin ekki hafa samþykkt sameiginlega umsögn nokkurra félagasamtaka um andstöðu við ný vatnalög þrátt fyrir að nafn þeirra sé á umsögninni. Þingmaður Samfylkingar spurði hvaða Framsóknarmaður hefði skammað formanninn til að hann skipti um skoðun.

Formaður iðnaðarnefndar las upp úr bréfi frá Birni B. Jónssyni, formanni Ungmennafélags Íslands, við upphaf þingfundar. Þar lýsti Björn því yfir að samtök sínu ættu enga aðild að umsögn nokkurra samtaka um vatnalagafrumvarp stjórnvalda þrátt fyrir að nafn þeirra væri sett á umsögnina. "Og mér finnst, hæstvirtur forseti, að sem formanni nefndarinnar harmi ég þessar rangfærslur," sagði Birkir Jón Jónsson, formaður iðnaðarnefndar. "Ég vona svo sannarlega að hér sé aðeins um mistök að ræða sem ekki megi endurtaka sig í löggjafarstarfi hér á háttvirtu Alþingi."

Sigurður Kári Kristjánsson, þingmaður Sjálfstæðisflokks, gagnrýndi harkalega hvernig hefði verið staðið að umsögninni. "Við hljótum að gera þá kröfu til þingsins og forsætisnefndar þingsins að það verði rannsakað nákvæmlega hvernig að þessu máli var staðið. Þetta mál er ekki fullklárað."

Ungmennafélag Íslands var eitt nokkurra félagasamtaka sem tóku þátt í átakinu "Vatn fyrir alla" fyrr í vetur og eru þau öll skráð fyrir umsögninni.

Ögmundur Jónasson, þingflokksformaður Vinstri-grænna og formaður BSRB, sem áttu frumkvæði að átakinu, sagði andstöðu UMFÍ koma sér mjög á óvart. Enda hefðu samtökin verið samstíga þeim í ferlinu. "Nú síðast fyrir fáeinum dögum lýsti UMFÍ og formaður þeirra samtaka, og ég er með skeyti þar um því til staðfestingar, samþykki við því hvernig staðið yrði að kynningu fyrir iðnaðarnefnd Alþingis á þessari umfjöll og umsögn sem UMFÍ hefur átt aðild að. Ég get náttúrulega ekki borið ábyrgð á því þó forsvarsmenn UMFÍ lesi ekki póstinn sinn eða fara ekki yfir þau gögn sem samtökunum berast."

Þessum viðbrögðum furðaði Guðlaugur Þór Þórðarson sig mjög á og sagði ótrúlegt að Ögmundur segði félagasamtök þurfa að segja sig frá umsögn sem þau hefðu ekki staðið að.

Valdimar Leó Friðriksson, þingmaður Samfylkingarinnar og formaður UMSK, einna stærstu aðildarsamtaka UMFÍ, lýsti líkt og Ögmundur furðu sinni á sinnaskiptum UMFÍ. "Það er alveg skýrt að þessi umsögn fór fyrir UMFÍ. Það eru til margir tölvupóstar til vitnis um það. Hvað skyldi hafa gerst í gær? Hver skammaði formann UMFÍ? Hver í ósköpunum dró hann inn í þessa umræðu? Hver í ósköpunum stendur fyrir því að sverta nafn UMFÍ?

Björn B. Jónsson, formaður Ungmennafélags Íslands, segir engan hafa skammað sig til að skipta um skoðun, nema ef vera kynni frétt Morgunblaðsins þar sem fjallað var um umsögnina. Hann segir samtök sín hafa átt þátt í yfirlýsingu um vatn fyrir alla sem átti að vera grunnur umsagnar um vatnalög. Síðan hafi sú umsögn breyst það mikið að samtök sín gætu engan veginn staðið að henni. Hann segist ef til vill ekki hafa verið vakandi fyrir breytingum á umsögninni þar sem hann hefur legið í flensu að undanförnu.