Réttarhöldin í uppnámi

Réttarhöldin yfir Zacharias Moussaoui, sem stundum er kallaður tuttugasti flugræninginn vegna þáttar hans í skipulagningu hryðjuverkaárásanna 11. september 2001, eru í uppnámi eftir að í ljós kom að einn lögmanna stjórnvalda hafði samband við nokkur lykilvitni í málinu. Hann á að hafa gefið þeim fyrirmæli um hvernig þau ættu að haga vitnisburði sínum svo öruggt væri að Moussaoui yrði sakfelldur. Dómarinn við dómstólinn í Virginíu er æfur vegna málsins og frestaði hann réttarhaldinu í gær. Talið er líklegt að þetta verði til þess að ekki verði lengur gerð krafa um að Moussaoui verði dæmdur til dauða.