Rússar draga krufninguna í efa

Eiturefnafræðingur segist hafa fundið lyf í líkama Slobodans Milosevic, fyrrverandi forseta Júgóslavíu, sem hafi óbeint valdið hjartaáfallinu sem dró hann til dauða á laugardagsmorgun. Rússnesk stjórnvöld efast um hlutleysi þeirra sem skera úr um dánarorsök forsetans fyrrverandi.

Flest bendir til að Slobodan Milosevic hafi látist úr hjartaáfalli en rannsókn á hvað olli því stendur ennþá yfir. Í dag greindi David Uges, eiturefnafræðingur sem rannsakaði lík Milosevic, frá því að hann hefði fundið leifar sýklalyfsins rífampisíns í líkama hans og verulegar líkur væru á að það hefði unnið gegn áhrifum hjartalyfja sem læknar stríðsglæpadómstólsins í Haag gáfu honum. Uges kvað líklegast að Milosevic hefði sjálfur tekið lyfið til að sýna fram á að meðferðin í Hollandi væri gagnslaus svo senda mætti hann til Rússlands. Sergei Lavrov, utanríkisráðherra Rússlands, sagðist í dag hafa fengið bréf frá forsetanum fyrrverandi þar sem hann lýsti áhyggjum sínum af hrakandi heilsu sinni. Þar sem stríðsglæpadómstóllinn í Haag treysti Rússum ekki til að meðhöndla Milosevic sagðist Lavrov áskilja sér allan rétt til að draga niðurstöður krufningarinnar á honum í efa. Marko, sonur Milosevic mun á morgun taka við líki föður síns en ekki hefur verið ákveðið hvar það verður grafið. Líklegast er þó talið að útförin fari fram í Belgrað.