Rússar treysta ekki krufningarniðurstöðum

Rússnesk yfirvöld segjast ekki treysta niðurstöðu krufningar á líki Slobodans Milosevic, fyrrverandi forseta Júgóslavíu, sem framvkæmd var í Hollandi og sýnir að hann hafi látist úr hjartaáfalli. Milosevic fannst látinn í haldi stríðsglæpadómstólsins í Haag um helgina.

Sergei Lavrov, utanríkisráðherra Rússlands, staðfesti í dag að handskrifað bréf hefði borist rússneskum yfirvöldum frá Milosevic. Þar segi hann að sig hafi grunað að verið væri að eitra fyrir sér. Lavrov sagði það hafa vakið áhyggjur á sínum tíma að dómstólinn hafi neitað að hleypa Milosevic til Moskvu til að sækja meðferð hjá læknum þar.