Dauðar álftir fundust í Rangárvallasýslu

Tvær álftir fundust dauðar í Rangárvallasýslu skammt frá Þjórsá og var þeim hent í ruslagám samkvæmt ráðleggingum héraðsdýralæknis. Fuglarnir verða ekki rannsakaðir þar sem þeir voru færri en fimm í hópi, en aðeins er hættustig eittí gildi hér á landi vegna fuglaflensu.

Tvær álftir fundust dauðar við sveitaveg í Rangárvallasýslu í gær og stóð fólkinu sem fann fuglana hreint ekki á sama vegna frétta af fuglaflensu sem hefur teygt sig til Norðurlandanna. Róbert Einarsson ábúandi á bænum Króki í Rangárvallasýslu hafði samband við Héraðsdýralækni sem sagði dauða álftanna að öllum líkindum eðlilegan. Þar sem fuglarnir voru ekki fimm eða fleiri í hóp þykir ekki ástæða til frekari aðgerða miðað við það áhættustig sem er hér á landi vegna fuglaflensu. Róbert fjarlægði fuglana að beiðni dýralæknisins og henti hann þeim í ruslagám skammt frá Landvegamótum.