Njósnari handtekinn í Svíþjóð

Snurða hefur hlaupið á þráðinn í samskiptum Rússa og Svía eftir að rússneskur vísindamaður var handtekinn í Uppsölum, grunaður um njósnir. Rússar hafa sjálfir handtekið tvo njósnara sem grunaðir eru um að starfa fyrir Breta. Maðurinn, sem talinn er á þrítugsaldri var handtekinn í síðustu viku í háskólabænum Uppsölum, skammt norður af Stokkhólmi, en hann starfaði á tilraunastofu sem vann að líftæknirannsóknum í landbúnaði. Gagnnjósnadeild sænsku leyniþjónustunnar hefur lítið gefið upp um hvað Rússanum er nákvæmlega gefið að sök að öðru leyti en því að fyrir um ári síðan hefði hann staðið fyrir njósnum sem skaðað hefðu sænska herinn. Í gær sendi rússneska utanríkisráðuneytið frá sér yfirlýsingu þar sem tafarlausra skýringa var krafist frá sænskum yfirvöldum. Þar kom einnig fram að samskipti ríkjanna myndu óhjákvæmilega skaðast vegna málsins. Dagblaðið Dagens Nyheter hefur eftir sænskum embættismanni að Svíar furði sig á þessum harkalegu viðbrögðum Rússana. Sjálfir virðast Rússar hafa orðið á barðinu á njósnurum því í gær var greint frá því að tveir slíkir hefðu verið handteknir í Mosvku, grunaðir um að snuðra fyrir Breta. Hvorki hafa fengist upplýsingar um hvenær þeir voru handteknir né af hvaða þjóðerni þeir eru. Í síðasta mánuði sökuðu stjórnvöld í Moskvu breska sendiráðsstarfsmenn um reyfarakenndar hátækninjósnir og undirróðurstarfsemi með því að veita frjálsum félagasamtökum fjárstuðning. Þótt kalda stríðinu sé þannig fyrir löngu lokið eimir greinilega enn eftir af ýmsum þáttum þess.