Al-Maliki verður forsætisráðherra

Vonast er til að fjögurra mánaða stjórnarkreppa í Írak sé á enda eftir að samkomulag náðist um hver tæki við embætti forsætisráðherra landsins. Jalal Talabani var endurkjörinn forseti á íraska þinginu í dag.

Fjórir mánuðir eru síðan þingkosningar voru haldnar í Írak en þrátt fyrir það hefur þingið aðeins komið einu sinni saman. Stjórnarkreppa hefur ríkt í landinu og hafa vandræðin á stjórnmálasviðinu síst orðið til að efla stöðugleikann í samfélaginu, enda rambar þjóðin á barmi borgarastyrjaldar. Eitt helsta ljónið í veginum fyrir myndun ríkisstjórnar hefur verið óánægja Kúrda og súnnía með Ibrahim al-Jaafari, forsætisráðherra sem leiddi fylkingu heittrúaðra sjía til sigursí kosningunum. Þar til í gær var Jaafari ófáanlegur til að láta af embætti en samkomulag hefur náðst um að félagi hans úr Dawa-flokknum, Jawad al-Maliki, verði forsætisráðherra í nýrri ríkisstjórn.

Stjórnmálaskýrendur segja skoðanir þeirra Jaafari og Maliki um flest svipaðar en sá síðarnefndi er talinn ákveðnari til verka, allt að því harðlínumaður. Hans bíður erfitt verk að sannfæra sjía og Kúrda um að hann verði forsætisráðherra allrar þjóðarinnar, en ekki bara sjía. Til að hægt væri að fela Maliki umboð til stjórnarmyndunar varð að kalla þing saman í dag svo það gæti framlengt kjörtímabil Kúrdaleiðtogans Jalal Talabani, sitjandi forseta landsins. Súnníar fengu aftur á móti embætti þingforseta í sinn hlut. Erfitt verk bíður nýju ríkisstjórnarinnar því ekkert lát er á ólgunni í landinu. Í gærkvöld var sex íröskum hermönnum rænt í Beiji í norðurhluta landsins og þeir myrtir og í morgun fundust lík ellefu manna í Bagdad sem höfðu verið teknir af lífi.