Mladic að líkindum handtekinn

Óstaðfestar fregnir herma að Ratko Mladic, æðsti yfirmaður hers Bosníu-Serba, hafi verið handtekinn í Serbíu í dag. Hann hefur verið eftirlýstur fyrir stríðsglæpi í rúman áratug, þar á meðal fjöldamorðin í Srebrenica þar sem að minnsta kosti átta þúsund manns voru myrtir.

Fréttir af handtöku Ratko Mladic eru enn mjög óljósar en serbneska Tanjúg-fréttastofan greindi frá þessu síðdegis. Þar kom fram að Mladic hefði verið tekinn fastur í Belgrað, höfuðborg Serbíu, og verið væri að flytja hann til Haag í Hollandi þar sem stríðsglæpadómstóll Sameinuðu þjóðanna mun rétta yfir honum. Nú laust fyrir fréttir þvertók hins vegar talsmaður serbnesku ríkisstjórnarinnar, að Mladic hefði verið handtekinn og að því er AP-fréttastofan hermir er í þessum töluðu orðum verið að semja við Mladic um að gefa sig fram.

Ásamt Radovan Karadzic, fyrrverandi leiðtoga Bosníu-Serba, er Mladic sá maður sem stríðsglæpadómstóllinn vill helst hafa hendur í hárinu á. Hann var æðsti yfirmaður herafla Bosníu-Serba í stríðinu á Balkanskaga á síðasta áratug, bæði í Bosníu og síðar í Kosovo. Mladic er sagður hafa stýrt hinum illræmdu sporðdrekasveitum sem í júlí árið 1995 myrtu að minnsta kosti átta þúsund og eitt hundrað manns í bænum Srebrenica, sem er versta fjöldamorð í Evrópu frá lokum síðari heimsstyrjaldar. Mladic og Karadzic hafa farið huldu höfði síðasta áratuginn og eru stjórnvöld í Serbíu eða serbneska hluta Bosníu grunuð um að halda yfir þeim hlífiskildi en þar eru þeir álitnir þjóðhetjur. Serbnesk stjórnvöld eru hins vegar sögð hafa tekið sig á í þessum efnum í þeirri von að það greiði fyrir inngöngu landsins í Evrópusambandið.