Prodi fagnar sigri

talskir stjórnmálamenn eru búnir að vera í sannkallaðri rússíbanaferð í nótt. Eftir að Romano Prodi hafði þegar fagnað sigri í gærkvöldi, missti Ólívubandalag hans meirihlutann í öldungadeildinni. Síðustu atkvæðin utan úr heimi færðu því meirihlutann aftur, en tæpara getur það ekki staðið.

Prodi steig á svið í gærkvöldi ásamt formönnum samstarfsflokkanna, fagnaði sigri og lofaði því að ríkisstjórn hans myndi stjórna landinu næstu fimm árin. Það var því mikil gleði á Piazza Sant'Apostoli þar sem stuðningsmenn Ólívubandalagsins trúðu því að sigurinn væri í höfn. Þegar leið á nóttina fór heldur að síga á þeim brúnin og svo gerðist það ótrúlega: ríkisstjórnarflokkarnir sigu framúr og þegar öll atkvæði höfðu verið talin var Hægrabandalagið með 155 öldungardeildarþingmenn á móti 154 þingmönnum vinstrimanna.

Í neðri deildinni náðu flokkar Prodis hins vegar meirihluta með minnsta mögulega mun - 49,8% á móti 49,7% hægrabandalagsins. Vegna ákvæða í kosningalögum um öruggan meirihluta, skiptist fjöldi þingmanna

þannig að Ólívubandalagið fær 341 þingmann, en hægrabandalagið 277.

Í gær þótti það fjarlægur möguleiki að leikar gætu farið svona. Hvor sinn meirihlutinn í deildum þingsins.

Það var svo ekki fyrr en nú undir hádegi að kláraðist að telja atkvæði Ítala í útlöndum, en þeir fá að kjósa átján þingmenn, þar af sex í öldungadeildina. Meirihluti þeirra kaus Ólívubandalagið og þar með snerist dæmið aftur við. Endanlegar tölur gefa flokkabandalagi Prodis 158 þingmenn í öldungadeild en bandalag Berlusconis fær 156. Munurinn gæti því ekki verið

minni.

Prodi er þó borginmannlegur og segist vel geta myndað ríkisstjórn sem muni starfa næstu fimm árin. En þegar haft er í huga að ríkisstjórnin verður mynduð úr níu flokkum og aðeins þarf einn öldungardeildarþingmann til að falla úr skaftinu til að lama allt, þá er vissulega spurning hversu öflug sú ríkisstjórn verður.

Núverandi ríkisstjórnarflokkar hafa krafist endurtalningar á hálfri milljón ógildra atkvæða og ætla ekki að gefast upp fyrr en í fulla hnefana. Það stefnir því í áframhaldandi spennu hér næstu dagana, en þar til annað kemur í ljós er Romano Prodi verðandi forsætisráðherra landsins.