Flutningaskip strandaði eftir að áhöfnin sofnaði

Grunur leikur á að áhöfn rússnesks timburflutningaskips, sem strandaði við norðurströnd Sjálands í Danmörku í nótt, hafi sofnað á vaktinni. Danska ríkisútvarpið hefur eftir standgæslunni að skipið hafi ekki breytt um stefnu í yfir tvo tíma áður en það strandaði um klukkan hálffjögur í nótt að dönskum tíma. Skipstjórinn mun hafa sagt við lögreglu að það gæti hafa verið rétt að áhöfnin hafi sofnað. Áhöfnin var tekin í áfengispróf en enginn um borð reyndist ölvaður. Nokkrir dagar munu líða áður en hægt verður að draga skipið aftur á flot en á meðan er þess gætt að ekki leki olía úr skipinu.