ElBaradei í Íran vegna kjarnorkudeilu

Mohammed ElBaradei, forstjóri Alþjóðakjarnorkumálastofnunarinnar er kominn til Írans til að þrýsta á þarlenda ráðamenn að hætta við kjarnorkuáform sín.

Íranar náðu mikilvægum áfanga í kjarnorkuáætlun sinni í vikubyrjun þegar þarlendum vísindamönnum tókst að auðga úran. Þar með færðust þeir skrefi nær því að geta framleitt rafmagn úr kjarnorku, en líka að framleiða kjarnavopn. Því ákvað Mohmamed ElBaradei, forstjóri Alþjóðakjarnorkumálastofnunarinnar að halda þegar í stað til Írans til að reyna til þrautar að fá klerkastjórnina ofan af áformum sínum. Við komuna til Teheran í gærkvöld kvaðst ElBaradei bjartstýnn á að heimsókn sín skilaði árangri. "Nú er rétti tíminn fyrir pólitíska lausn og leiðin að henni er viðræður." Eftir hálfan mánuð flytur ElBaradei svo öryggisráði Sameinuðu þjóðanna skýrslu um stöðu mála í Íran og á grundvelli hennar verður ákvörðun tekin um aðgerðir gegn ríkinu. Ríkisstjórnir landanna fimm sem þar hafa neitunarvald, þar á meðal Rússland og Kína, lýstu í gær vanþóknun sinni á framferði Írana. Ekki er þó víst að sátt náist um stefnu öryggisráðisins því Kínverjar leggjast gegn viðskiptaþvingunum og öðrum refsiaðgerðum.