Hvalveiðisinnar í meirihluta?

Ríki sem eru hlynnt hvalveiðum hafa náð undirtökunum í Alþjóðahvalveiðiráðinu að mati breska blaðsins Independent. Sjávarútvegsráðherra segist fagna tíðindunum en kveðst þó vonlítill um að Íslendingar muni sækja gull í greipar ráðsins á ársfundi þess í sumar.

Ársfundur Alþjóðahvalveiðiráðsins fer fram í júní á eyríkinu St. Kitts og Nevis og er útlit fyrir að ríki sem hlynnt eru hvalveiðum verði þar í meirihluta í fyrsta sinn í rúma tvo áratugi. Greinarhöfundar eru ekkert að skafa utan af hlutunum þegar þeir lýsa þeirri nýju stöðu sem upp er komin innan ráðsins heldur tala þeir um að valdarán hafi hreinlega átt sér þar stað. Japanar, með fulltingi Íslendinga og Norðmanna, hafi með lúmskum hætti undanfarin ár lokkað inn í ráðið ný ríki sem flest eru frá Afríku og Karabíska hafinu. Þau taki við margra milljarða króna efnahagsaðstoð fegins hendi gegn því að styðja hvalveiðar. Árið 2000 voru aðildarríki Alþjóðahvalveiðiráðsins fjörtíu en nú eru þau orðin 66. Independent segir nítján þessara nýju ríkja vera bandamenn hvalveiðiþjóðanna. Einar K. Guðfinnsson sjávarútvegsráðherra er ekki eins viss.

Þótt 75 prósent atkvæða þurfi til að ógilda ákvörðun ráðsins um bann við hvalveiðum í atvinnuskyni á að vera hægt að ná fram breytingum á ýmsum ákvörðunum þess með einföldum meirihluta, til dæmis að efla viðskipti með hvalkjöt og koma á leynilegum atkvæðagreiðslum á fundum ráðsins. Engu að síður ber Einar litlar væntingar til ársfundarins í sumar.