Sakaðir um að hafa átt þátt í ódæðunum í Súdan

Öryggisráð Sameinuðu þjóðanna samþykkti í daga að frysta erlenda bankareikninga og eigur fjögurra Súdana auk þess hafa þeir verið settir í farbann. Mennirnir eru sakaðir um að hafa átt þátt í ódæðum sem framin voru í Darfur-héraði í Súdan.

Átök uppreisnarmanna og stjórnarhers í Darfur hafa kostað tug þúsund manns lífið auk þess sem minnst tvær milljónir manna hafa hrakist frá heimilum sínum. Tólf ríki ráðsins af fimmtán greiddu atkvæði með tillögunni en Katarar, Kínverjar og Rússar sátu hjá. Það var í mars 2005 sem Öryggisráðið leyfði fyrst að refsiaðgerðum yrði beitt gegn einstaklingum sem gerðu að engu tilraunir til friðarsamninga eða fremdu mannréttindabrot í Darfur.

Þau þrjú Afríkuríki sem eiga nú sæti í ráðinu, það er Kongó, Gana og Tansanía, samþykktu að greiða tillögunni atkvæði sitt eftir að ráðið hafði einnig samþykkt yfirlýsingu fulltrúa Tansaníu þar sem stuðningur var veittur við friðarviðræður sem fara fram á vegum Afríkubandalagsins í Abuja í Nígeríu. Sáttasemjarar hafa gefið deiluaðilum frest fram á sunnudagt til að semja um frið.