Gíanendra segist ætla að endurreisa þing Nepal

Allsherjarverkfall og fjöldamótmæli hafa verið afboðuð í Nepal eftir að Gíanendra konungur sagðist ætla að endurreisa þing landsins. Maóistar hafna hins vegar tilboði konungs alfarið.

Enn á ný söfnuðust tugþúsundir manna saman á götum Katmandu í morgun, en að þessu sinni til að fagna. Hluti mótmælenda safnaðist samt saman fyrir utan konungshöllina og krafðist þess að Gyanendra konungur yfirgæfi landið. En þó að lögregla hafi varnað mótmælendum að fara of nærri höllinni kom ekki til ofbeldis eins og undanfarna daga. Gyanendra ávarpaði þjóð sína í gær og sagðist þá ætla að setja þingið aftur á og lofaði að vinna náið með uppreisnarmönnum kommúnista.

Hann boðaði einnig kosningu sérstaks þings sem mun vinna að endurskoðun stjórnarskrár landsins. Þetta tilboð konungs hefur orðið til þess að fjöldamótmælum sem áttu að fara fram í dag hefur verið aflýst og eins hefur verið hætt við allsherjarverkfall í höfuðborginni Katmandú.

Bandalag sjö stjórnaranstöðuflokka sem verður í meirihluta þegar þingið kemur saman á ný í næstu viku, segir að fyrsta verkefnið verði að semja við maóista. Það gæti hins vegar reynst þrautin þingri, því að þeir hafna alfarið tillögum Gyanendra og segja stjórnarandstöðuna vera að gera mikil misttök með því að ganga að skilmálum hans.