Pinochet fær ekki viðhafnarútför

Til átaka kom í Santiago, höfuðborg Chile, í gærkvöldi eftir að fréttir bárust af því að Augusto Pinochet, fyrrverandi einræðisherra landsins, væri látinn. Pinochet fær ekki viðhafnarútför og þjóðarsorg hefur ekki verið lýst yfir í landinu.

Pinochet var níutíu og eins árs. Hann hafði verið heilsutæpur um nokkurt skeið og fékk alvarlegt hjartaáfall viku fyrir andlát sitt. Hann var oddviti herforingjastjórnarinnar sem rændi völdum í Chile árið 1973 og ríkti í sautján ár. Á þeim tíma voru yfir þrjú þúsund manns myrtir eða látnir hverfa. Talið er að allt að tuttugu og átta þúsund manns hafi sætt pyntingum meðan á ógnarstjórninni stóð.

Marg sinnis hefur verið reynt að draga Pinochet fyrir dóm en án árangurs. Í nóvember gaf hann út yfirlýsingu og sagðist taka pólitíska ábyrgð á ofbeldinu sem var framið í stjórnartíð hans.

Andstæðingar Pinochets fögnuðu dauða hans á götum Santiago, höfuðborgar Chile, í gærkvöldi en á samta tíma syrgðu stuðningsmenn hans leiðtoga sinn fyrir utan hersjúkrahúsið þar sem hann lést.

Til átaka kom milli bandamanna einræðisherrans fyrrverandi og andstæðinga hans þegar leið á nóttina og þurfti lögregla að beita táragasi og vatnsþrýstidælum á óeirðaseggi. Fjölmargir voru handteknir en ekki er vitað hvort einhverjir særðust í átökunum.

Pinochet fær ekki viðhafnarútför og þjóðarsorg verður ekki lýst yfir í landinu. Flaggað verður þó í hálfa stöng í opinberum byggingum í Chile í dag. Pinochet verður jarðsettur á morgun og fær útför í samræmi við stöðu sína hjá hernum í Chile.