Meira en hundrað fallnir

Írak rambar á barmi borgarastyrjaldar eftir sprengingu á einum heilagasta stað Sjíja í gær. Meira en hundrað manns hafa farist í tugum sprengjuárása síðan í gær.

Martraðirnar virðast ætla að rætast, því að síðan í gær hefur bókstaflega allt logað í óeirðum. Í höfuðborginni Baghdad ríkir algjört útgöngubann og vopnaða her- og lögreglumenn má sjá á vappi um alla borg.

Sjíar í hefndarhug hafa gengið berseksgang um allt land til að hefna fyrir árásina á al-Askari. Fimmtíu sundurskotin lík fundust í Baghdad í nótt og fjörutíu og sjö verksmiðjustarfsmenn voru skotnir til bana við vegtálma rétt utan við höfuðborgina. Þeir voru á leið heim úr vinnu í rútu, þegar þeim var skipað út úr bifreiðinni og þeir umsvifalaust skotnir. Þá hafa nærri þrjátíu moskur súnnía verið brenndar til grunna.

Eftir að Saddam Hússein var steypt af stóli hefur óeining ríkt á milli helstu þjóðarbrotanna í Írak og mikil reiði hefur ríkt í herbúðum súnnía, sem finnst þeir engu fá ráðið um stjórn landsins. Eftir þingkosningarnar í desember, þar sem þeir fjölmenntu á kjörstaði, benti ýmislegt til að söguleg sátt væri í nánd. Atburðir síðustu daga hafa hins vegar breytt því í einu vetfangi og nú er versta martröð þeirra nær veruleika en nokkru sinni,borgarastyrjöld í Írak.