Snow næsti talsmaður Hvíta hússins

Tony Snow, fréttamaður á Fox-sjónvarpsstöðinni bandarísku, verður næsti talsmaður Hvíta hússins. Hann tekur við starfi Scotts McClellan sem í síðustu viku var látinn taka pokann sinn.

Snow var ræðuritari í forsetatíð George Bush eldri en undanfarin ár hefur hann stýrt eigin sjónvarpsþáttum á Fox-stöðinni. Enda þótt stöðin sé höll undir Repúblikanaflokkinn hefur Snow verið gagnrýninn á stefnu núverandi forseta og því verður forvitnilegt að sjá hvernig honum tekst að hífa upp vinsældir hans.