Gáfust upp eftir daglangt umsátur

Palestínumennirnir sex sem gáfust upp fyrir ísraelska hernum eftir daglangt umsátur um fangelsið sem þeir sátu í, verða kvaddir fyrir ísraelskan dómstól og látnir svara til saka fyrir morð á ísraelskum ráðherra. Frá þessu greindi ísraelskur embættismaður í gærkvöld. Einn mannanna, Ahmed Saadat, er leiðtogi Alþýðufylkingar til frelsunar Palestínu og sagði talsmaður fylkingarinnar að umsátursins verði hefnt.

Þúsundir Palestínumanna mótmæltu gjörðum Ísraelsmanna á götum úti í gærkvöld. Framkvæmdastjóri Arababandalagsins, sagði Bandaríkjamenn og Breta bera ábyrgð á ástandinu sem skapaðist í fangelsinu og greinilegt væri að einhvers konar samráð hefði átt sér stað milli Ísraelsmanna, Bandaríkjamanna og Breta.