Argentína

Argentínumenn eru í C riðli með Hollendingum, Fílabeinsstrendingum og Serbum og Svartfellingum. Þeir eru í níunda sæti á heimslista FIFA en Hollendingar mótherjar þeirra eru í því þriðja. Þetta er sterkur riðill og útlit fyrir óvænt úrslit.

Í Argentínu ríkir mikil hefð fyrir knattspyrnu þar sem þátttaka og árangur á heimsmeistaramótinu er skilyrði. Liðið er í nokkurri endurnýjun og treysta þeir á nýja kynslóð leikmanna sem nú þegar hefur sett svip sinn á evrópska knattspyrnu.

Þjálfari liðsins er Jose Pekerman hann hefur gert frábæra hluti með unga knattspyrnumenn og m.a. stýrt Argentínu til sigurs á HM 20 ára og yngri árin 1995, 1997 og 2001. Marga af þeim leikmönnum sem hann þjálfaði þá hefur hann valið í hópinn nú.

Gabriel Heinze leikmaður Manchester United var valinn í hópinn þrátt fyrir að hafa verið fótbrotinn í vetur og lítið sem ekkert leikið. Hann átti skínandi tímabil í fyrra og var þá valinn leikmaður ársins af áhangendum United. Ekki var pláss fyrir hinn leikreynda Javier Zanetti leikmann Inter í hópi Pekermans.

Leikur liðsins veltur að mestu leyti á hinum frábæra leikstjórnanda Villareal Juan Roman Riquelme. Hann á það til að detta niður en við því mega Argentínumenn alls ekki. Hin ungi leikmaður Evrópumeistara Barcelona Leo Messi gæti sprungið út en við hann eru bundnar miklar vonir.

Fyrirliði: Juan Pablo Sorin

Lykilmaður: Juan Roman Riquelme

Gætu slegið í gegn: Leo Messi og Carlos Teves