Öryggisráðið þarf að bregðast við af hörku

Íranar hafa færst skrefi nær atómsprengjunni eftir að þeir tilkynntu í gær að þeim hefði tekist að auðga úran. Rússar skoruðu á Írana í morgun að láta af kjarnorkuvinnslu sinni. Kínverjar segja yfirlýsingar Írana ekki samræmast kröfum Sameinuðu þjóðanna.

Íranar fögnuðu ákaft og vegsömuðu guð sinn þegar Mahmoud Ahmandinejad, forseti landsins, tilkynnti í gær að írönskum vísindamönnum hefði tekist að auðga úran. Vinnslan er nauðsynleg til að hægt sé að nýta efnið til orkuframleiðslu en líka til að búa megi til kjarnorkusprengjur. Þetta óttast einmitt þorri alþjóðasamfélagsins sem telur Írana hafa óhreint mjöl í pokahorninu.

Condoleezza Rice, utanríkisráðherra Bandaríkjanna, sagði í dag að Öryggisráð Sameinuðu þjóðanna yrði að bregðast af hörku við yfirlýsingu Íransforseta en ráðið gaf Írönum frest til 28. apríl til að hætta auðgun úrans.

Hún sagði Írana hafa fengið mörg tækifæri til að semja en það hafi þeir ekki gert. Rice telur því að þegar ráðið komi saman verði komið að þeim tímapunkti að til aðgerða verði að grípa. Ekki veðri hægt að láta aðgerðir Íransstjórnar viðgangast.

Í morgun skoruðu Rússar á klerkastjórnina í Íran að stöðva vinnslu sína enda væru þeir á rangri leið.

Kínverjar, sem hafa neitunarvald í Öryggisráðinu, hafa lýst því yfir að þeir væru andvígir refsiaðgerðum gegn Írönum. Í dag sagði Wang Guangya, fulltrúi Kínverja sem eru nú í forsæti í ráðinu að nýjustu yfirlýsingar Írana væru ekki í samræmi við skilyrði alþjóðasamfélagsins. Hann hvatti alla málsaðila til að sýna stillingu.