Öryggisráðið þarf að bregðast við af hörku segir Rice

Öryggisráð Sameinuðu þjóðanna þarf að bregðast af hörku við fullyrðingum Írana frá í gær um að þeim hafi tekist að auðga úran. Þetta sagði Condoleezza Rice, utanríkisráðherra Bandaríkjanna, í dag. Hún segir yfirlýsingu Íransforseta í sjónvarpsávarpi í gær frekari sönnun þess að stjórnvöld í Teheran ætluðu ekki að fara að skilyrðum alþjóðasamfélagsins sem óttast að þeir ætli að framleiða kjarnorkuvopn en ekki nota kjarnorku í friðsamlegum tilgangi. Öryggisráðið hefur gefið Írönum frest til tuttugasta og áttunda þessa mánaðar til að hætta auðgun úrans og er Mohamed el-Baradei, yfirmaður Alþjóða kjarnorkumálastofnunarinnar, væntanlegur til Teheran síðar í vikunni.