Rússar skora á Írana að láta af kjarnorkuvinnslu

Íranar hafa færst skrefi nær atómsprengjunni eftir að þeir tilkynntu í gær að þeim hefði tekist að auðga úran. Rússar skoruðu á Írana í morgun að láta af kjarnorkuvinnslu sinni.

Íranar fögnuðu ákaft og vegsömuðu guð sinn þegar Mahmoud Ahmandinejad, forseti landsins, tilkynnti í gær að írönskum vísindamönnum hefði tekist að auðga úran. Vinnslan er nauðsynleg til að hægt sé að nýta efnið til orkuframleiðslu en líka til að búa megi til kjarnorkusprengjur. Þetta óttast einmitt þorri alþjóðasamfélagsins sem telur að sá leyndarhjúpur sem hvílt hefur yfir vinnslunni hingað til bendi til að Íranar hafi óhreint mjöl í pokahorninu. Bandaríkjamenn hafa varað klerkastjórnina í Íran við að halda áformum sínum til streitu og í morgun skoruðu Rússar á hana að stöðva vinnsluna enda væru þeir "á rangri leið" eins og það var orðað í yfirlýsingu rússneska utanríkisráðuneytisins. Mohammed ElBaradei, forstjóri Alþjóðakjarnorkumálastofnunarinnar, mun á næstunni halda til Teheran til viðræðna við ráðamenn þar og mun að þeirri heimsókn lokinni skila skýrslu til Öryggisráðs Sameinuðu þjóðanna. Líkurnar á að Íranar verði beittir viðskiptaþvingunum hafa minnkað umtalsvert eftir að Kínverjar, sem hafa neitunarvald í ráðinu lýstu því yfir að þeir væru þeim andvígir.