Íranar virtu kröfur Öryggisráðs SÞ að vettugi

Alþjóða kjarnorkumálastofnunin kynnti Öryggisráði Sameinuðu þjóðanna fyrir stundu nýja skýrslu um stöðu mála í kjarnorkudeilunni við Írana. Bandaríkjaforseti segist vona að hægt verði að semja um lausn deilunnar.

Í skýrslu Alþjóða kjarnorkumálastofnunarinnar kemur fram að stjórnvöld í Teheran hafi virt að vettugi kröfu ráðsins um að auðgun úrans yrði hætt. Frestur til þess var gefinn fram til dagsins í dag. Í skýrslunni segir að Íranar hafi þvert á móti hert á aðgerðum sínum. Auk þess hafi þeir ekki svarað svo vel sé spurningum um kjarnorkuáætlun sína.

Skýrsluhöfundar segja rannsóknir staðfesta fullyrðingar Írana um að þeim hafi tekist að augða úran þannig að það gagnist fyrir orkuver.

Bush Bandaríkjaforseti sagði í dag að það væri sameiginleg von allra að hægt yrði að semja við Írana um að láta af kjarnorkuáætlun sinni.

Bretar segjast ætla að fara þess á leit við Öryggisráðið að það auki þrýsting á Írana.

Fulltrúi Kínverja í ráðinu sagði í dag að öll ríki vildu fara samningsleiðina.

Ahmadinejad, Íransforseti, sagði á fjöldafundi í dag, skömmu áður en skýrslan var kynnt, að það væri vilji allra Írana að ríkið hefði yfir kjarnorkutækni að ráða. Af því má ráða að Íranar eru hvergi bangnir og ætla ekki að láta undan í deilunni við vesturveldin.