Klofningur sjaldan meiri í ESB

Klofningur hefur sjaldan virst vera meiri í Evrópusambandinu en nú. Djúpstæður ágreiningur um árlegar endurgreiðslur sem breski ríkissjóðurinn fær úr sameiginlegum sjóðum ESB, um rausnarlegar niðurgreiðslur til franskra bænda, óvænt ólíkar leiðir sem Frakkar og Þjóðverjar hafa reynst fara varðandi stjórnarskrársáttmála sambandsins, og veikt gengi evrunnar leggst allt á eitt um að varpa skugga á leiðtogafundinn sem hefst í Brussel í dag og setur lokapunktinn á formennskumisseri Lúxemborgar. Talað hefur verið um þennan leiðtogafund sem tækifæri til að hleypa nýju sjálfstrausti í Evrópusambandið, hálfum mánuði eftir að kjósendur í Frakklandi og Hollandi höfnuðu stjórnarskrársáttmála sambandsins í þjóðaratkvæðagreiðslum og settu framhald Evrópusamvinnunnar þar með í uppnám. Jose Manuel Barroso, forseti framkvæmdastjórnarinnar, brýndi leiðtogana til dáða í gær. Tækist þeim ekki að leysa þann hnút sem stjórnarskrármálið er nú komið í kunni það að steypa sambandinu í "endalausa kreppu og stöðnun". Líklegast þykir þó að ekki takist neitt samkomulag um "björgun" stjórnarskrársáttmálans. Síðustu vikuna fyrir leiðtogafundinn hafa deilur um fjárlagaramma sambandsins fyrir tímabilið 2007-2013 komið mjög skýrt upp á yfirborðið. Tony Blair, forsætisráðherra Bretlands, tjáði bæði Jacques Chirac Frakklandsforseta og Gerhard Schröder Þýskalandskanslara að hann myndi beita neitunarvaldi gegn fjárhagsáætluninni ef hreyft verði við bresku endurgreiðslunum án þess að niðurgreiðslukerfi landbúnaðarins í ESB yrði jafnframt tekið til gagngerrar endurskoðunar. Það kerfi gleypir um 40 af hundraði allra útgjalda ESB. Bretar taka við ESB-formennskunni um næstu mánaðamót.