Enn nægur snjór í Bláfjöllum

"Við erum afskaplega ánægðir með daginn og allt búið að ganga feykivel. Allir farið upp heilir og komið heilir niður. Veðrið er líka búið að leika við okkur," segir Hlynur Skagfjörð, rekstrarfulltrúi skíðasvæðisins í Bláfjöllum. Í gær var vígð ný lyfta í Bláfjöllum sem hlaut nafnið Kóngurinn og var það forseti Íslands sem tók nýju lyftuna formlega í notkun. Í tilefni dagsins var frítt inn á skíðasvæðið. "Ég ætla rétt að vona að þeir sem lögðu leið sína hingað í dag muni bera út fagnaðarerindið að það er enn nægur snjór hér. Fólki líst líka vel á lyftuna og hefur verið að læra að komast í hana og úr í dag. Annars vil ég þakka öllu skíða- og brettafólki á öllum aldri sem heimsótti svæðið í dag. Þetta er búinn að vera frábær dagur í alla staði," segir Hlynur.