Fimmfalt fleiri reyna sjálfsvíg

Ætla má að fjöldi sjálfsvígstilrauna hér á landi hafi nær fimmfaldast síðustu ár samkvæmt tölum sem Fjórðungssjúkrahúsið á Akureyri hefur tekið saman. Tölurnar sýna mikla aukningu. Fjöldi þeirra sem reynt hefur að taka líf sitt hefur þrefaldast á 19 árum og sjálfsvígstilaunir hafa nær fimmfaldast. Síðustu 19 ár er um að ræða 414 manns og 664 tilraunir til sjálfsvígs og ef skoðaðar eru tölur síðustu fimm ára er um að ræða 181 mann og 309 sjálfsvígstilraunir. Fjórðungssjúkrahúsið þjónar Norðausturlandi. Að sögn Brynjólfs Ingvarssonar geðlæknis, sem hafði umsjón með rannsókninni, er ekkert sem bendir til þess að tölurnar séu aðrar í öðrum landsfjórðungum. Því má ætla að svipuð aukning hafi orðið á landsvísu. Brynjólfur segir að tíðni sjálfsvígstilrauna sé hæst í hópi yngra fólks. Þá reyni fleiri konur að svipta sig lífi en karlar. Þær eru 64 prósent á móti 36 prósentum karla og fjölmennasti hópurinn eru konur á aldrinum 15 til 20 ára. Brynjólfur segir að reynt hafi verið að giska á og veiða það upp úr erlendum rannsóknum hverjar ástæðurnar séu fyrir fleiri sjálfsvígstilraunum og ýmsar kenningar hafi komið fram. Engu síður sé ekki vitað hverjar ástæðurnar séu hér á landi og það vanti rannsóknir hérlendis þess efnis. Um helmingur er lagður inn á geðdeild í kjölfar sjálfsvígstilrauna. Hinir leita sér aðstoðar annars staðar eða afþakka alla heilbrigðisþjónustu. Brynjólfur segir að geðlæknar hafi að sjálfsögðu velt því mikið fyrir sér hvers vegna fólki líði svo illa að það gefist upp og grípi til óyndisúrræða eins og sjálfsvígs. Að baki liggi oftast gífurleg vanlíðan og vonleysi og oft einstæðingsskapur. Geðlæknar þekki hins vegar ekki muninn á þeim 660 manns hér á landi sem hafi gripið til þessa örþrifaráðs og hinum sem áttu við svipaða vanlíðan að stríða en reyndu ekki að svipta sig lífi.