Frístundaveiði bara í soðið

Svo getur farið að vestfirsk fyrirtæki, sem ætla að fara að gera út á erlenda sjóstangaveiðimenn, verði að kaupa handa þeim kvóta. Í lögum um fiskveiðar eru svonefndar frístundaveiðar skilgreindar svo að hverjum sem er sé heimilt að veiða sér í soðið, en sú hófsemi vill fara úr böndunum. Á vefnum Skip.is er greint frá þessu vandamáli í Noregi, þar sem erlendir frístundaveiðimenn mæta á veiðisvæðin á kæli- og jafnvel frystibílum, og reyni að moka sem mestum afla upp í þá. einkum séu þýskir ferðamenn til vandræða á þessu sviði, en það eru einmitt Þjóðverjar sem hafa skráð sig til frístundaveiða á Vestfjörðum næsta sumar. Már Erlingsson sveitarstjóri á Tálknafirði, sem á von á Þjóðverjum næsta sumar til veiða, ótatst þetta þó ekki. Hann segir að ráðgert sé að aðeins fimm þjóðverjar verði í hverjum hópi og til standi að þeir komi hingað til lands í flugi. Það verði því ekki um að ræða neina söfnun í frystibíl, sem færi utan með Norrænu, eða í frystigám, sem færi með örðu skipi. Ef allt fer að vonum vestra, hefjast veiðarnar frá Tálknafirði og Súðavík næsta vor og ráðgert er að fjölga stöðum gangi þetta vel.