Fólk snúi ekki strax til baka

Thad Allen, yfirmaður björgunarmála á hamfarasvæðunum við suðurströnd Bandaríkjanna, ráðleggur fólki frá því að snúa strax aftur til New Orleans, en það er þvert á yfirlýsingar borgarstjórans Rays Nagins sem tilkynnti í gær að til stæði að hleypa um 200 þúsund manns aftur inn í borgina á næstu tíu dögum. Allen benti á að vatns-, holræsa- og rafmagnsmál væru enn í ólestri og hann ráðlagði fólki að fara um með ýtrustu varúð ef það sneri á annað borð til baka. Eigendur nokkurra fyrirtækja hafa þegar snúið aftur og opnað þau að áeggjan Nagins borgarstjóra. 40 prósent borgarinnar eru enn umflotin vatni og þá ganga vopnaðir lögreglumenn og hermenn um götur til þess að reyna að koma í veg fyrir rán og gripdeildir. Auk þess gildir útgöngubann í borginni að næturlagi.